As mòven al veint ed premaveira al fòi novi dal piòp, inzèma al tèt na turturèina las lèsa ed cuntenev al pèni, in la iòla soquanti malgareti as veren ai raz teved dal soul; in dla piàza, quesi vòda, i arivèn, in chersànd, al nòti rubòsti ed la bànda; na fila ed gèint con avtoritee e bandèri las fèirma piàn pianèin davanti al mùr dal càmp. Inzema a na lastra ed melmer as lez in gros la scrèta “VIVA L’ITALIA”. Le al sospìr che un dé, armai luntàn un àm l’urlé adnànz al plutòun armee in posizioun. Despiasu e spavinte, soquant preseint i guardèn per un atim chi oc ardeint chin dmandeven piete; un cmand sèc, perentòri e soquanti ràfichi, sciuptànd, i culpèn al pèt indifèis ed cal combateint. Un ultèm squàs e dal còrp stìnchi, a schizé un fiòt chèld ed sànghev cal culure’ed ras al selcie. Adesa a sòuna la tràmba: in dla piàza a sé fat silèinzi, ognun, per un atim, l’artorna con la meint a cal tragic mumeint, ai ultem penser ed cal fradel: a la ca’, ai afet, al muntagli amichi chi l’acolsen insem a di eter compagn, a la libertee zerchèda e armài avsèina… Al Sendègh, seri, as fa avanti e al crov, con na curouna d’aloro, cal màci ed sanghev armài scansledi. La banda l’artourna a suner; al corteo, ricompost, al s’invia ed nov; al tràfic, prèma deviee, al tòrna a circolèr; i pedoun i pasen ed nov, disinvòlt, destràt, ma in degnen dun sguerd cl’angol rumèt. Un cagnèin, sospetòus, al se vsèina al vèc pegn ed fròunt, as guarda da tòrna, al nesa e al lèva la gamba… i uslein, nascost tra i ram i sceflen, chelem, srein, leber…; piò sò, sòvra al nòvli in al zèl di eroi, “PEPPO” al partigiàn, al guarda e al rèd cuntèint: l’Italia l’è finalmeint lebbra! BIOGRAFIA AUTORE Gabriele Schenetti è nato a Sassuolo, ove risiede. In gioventù è stato educatore presso l'Oratorio Don Bosco. Da qualche anno ha rivolto la sua attenzione alla valorizzazione del dialetto locale. |